Çdo shteg në Overland Kosova ka një nivel prej 1 deri në 5. Ja çka do të thotë secili: terreni, vetura, gomat, ngritja dhe përvoja që të duhet.
Çdo shteg në aplikacion ka një shkallë prej 1 deri në 5. Qëllimi është i thjeshtë: me e ditë para se me u nis a është shtegu për veturën tënde dhe për përvojën tënde. Këtu e shpjegojmë çka kontrollojmë për secilin nivel.
Vlerësimi është për kushte të thata. Pas shiut, me baltë ose borë, llogarite shtegun një nivel ma të vështirë.
Shkalla me një shikim
| Niveli | Terreni | Vetura | Përvoja |
|---|---|---|---|
| 1 · E Lehtë | Rrugë zhavorri e makadami, pjerrtësi të buta | Çdo veturë pak e ngritur, SUV | Pa përvojë offroad |
| 2 · E Mesme | Gropa, kanale uji, gurë të vegjël, pjerrtësi ma të forta | SUV ose 4x4 me goma A/T | Pak përvojë |
| 3 · E Vështirë | Gurë të mëdhenj, baltë, kalime përroi, pjerrtësi anësore | 4x4 me marsh të ulët, veturë e ngritur | Përvojë e mirë |
| 4 · Ekspert | Shkallë guri, ngjitje të forta, baltë e thellë, degë | 4x4 i modifikuar: goma M/T, ngritje, mbrojtje poshtë | Shumë përvojë, gjithmonë në grup |
| 5 · Ekstreme | Terren teknik, rrezik dëmtimi i veturës | 4x4 i përgatitur për garë: bllokues, winch | Vetëm për ekspertë, me spotter |
1 · E Lehtë
Rrugë malore të hapura, zhavorr e makadam. Mundesh me i ngas me çdo SUV dhe shpesh edhe me veturë të zakonshme pak të ngritur, kur është thatë. Ideale për familje dhe për daljen e parë.
2 · E Mesme
Rruga fillon me u prish: gropa, kanale uji që e presin shtegun, gurë të vegjël dhe pjerrtësi ma të gjata. Të duhet veturë e ngritur mirë dhe goma A/T (all-terrain). Me 4x4 është ma e qetë, por me kujdes mundesh edhe me SUV të mirë.
3 · E Vështirë
Këtu fillon offroadi i vërtetë. Gurë ma të mëdhenj, baltë, kalime përroi dhe pjesë ku vetura anon anash. Të duhet 4x4 me marsh të ulët (low range) dhe veturë e ngritur. Ka vend ku duhet me dal prej veture e me e kqyr rrugën këmbë para se me vazhdu.
- Ul presionin e gomave për tërheqje ma të mirë (rrisi prapë para asfaltit)
- Mos shko vetëm: minimum dy vetura
- Merre me vete setin bazë të tërheqjes: litar, shakëll, lopatë
4 · Ekspert
Shkallë guri, ngjitje e zbritje të forta, baltë e thellë dhe shtigje të mbuluara me degë. Vetura duhet të jetë e përgatitur: goma M/T (mud-terrain), ngritje (lift), mbrojtje poshtë (skid plates) dhe pika tërheqjeje të certifikuara. Rrezik real për me mbet, kështu që pajisjet e tërheqjes janë të detyrueshme.
5 · Ekstreme
Terren teknik ku dëmtimi i veturës është i mundshëm edhe për shoferë me përvojë. Bllokues diferenciali, winch dhe një spotter (dikush jashtë që të drejton) janë standard. Nëse po pyet a je gati, ende nuk je, dhe kjo është në rregull.
Çka tjetër e ndryshon vështirësinë?
- Moti: dy ditë shi mundet me e kthy një shteg të mesëm në të vështirë.
- Hija: pjesët nën pemë mbajnë baltë edhe në korrik. Lexo si ndryshon terreni i Kosovës me stinë.
- Vegjetacioni: shtigjet që s’mirëmbahen shpesh mbyllen me shkurre e degë.
- Ora e ditës: mos e nis një shteg Ekspert vonë pasdite.
Çdo shteg në listën e shtigjeve e ka nivelin, gjatësinë, lartësinë dhe raportet e fundit për kushtet prej shoferëve që sapo kanë qenë aty.
Pyetje të shpeshta
A mundem me e ngas një shteg të mesëm me SUV?
Shpesh po, kur është thatë dhe nëse vetura është e ngritur mirë e ke goma A/T. Pas shiut, llogarite një nivel ma të vështirë.
Çka do të thotë vetura e ngritur?
Largësia prej tokës deri te pika ma e ulët e veturës (ngritja). Sa ma e madhe, aq ma lehtë kalon mbi gurë e gropa pa e prek poshtë.
A duhet me qenë në grup?
Për shtigjet E Vështirë e ma lart, po: minimum dy vetura. Në mal shpesh s’ka sinjal për me thirr ndihmë.
KONTROLLUAR PËR HERË TË FUNDIT: 2026-09-28